choco polovoron ni mommy kat

mula pa sa pagkabata at di ako nahumaling sa mga matatamis na pagkain... at magpahanggang ngayon ay bihira kong hanapin ang ganitong mga pagkain. pana-panahon lamang kung sakaling hanapin ang panlasang ito. gusto ko yung sakto lang. yung tipong hindi ka kikilabutan sa sobrang katamisan na animo'y literal mong kinain ay asukal o dili kaya ay nilagok mo ng bongga ang isang basong arnibal. ang sa akin ay dapat mas nangingibabaw ang linam-linam ng pangunahing sangkap. halimbawa sa tsokolate, hindi ang tamis ang nais ko kundi yung lasa mismo ng kakaw... mamait-mait! yun ang tsokolate! kaya kung bibigyan ako ng tsokolate e pwede bang yung "plain dark chocolate" ha. :)

at sa aming flat naman, kabaliktaran ko si "mommy" kat. mommy kasi magkaka-baby na siya at excited na kaming lahat. sobrang "adik" ika nga sya sa kahit anong matatamis na pagkain. madalas makikitaan mo siyang me hawak na tsokolate, ice cream, cake at iba pa. animo'y batang ubod ng ligaya sa bawat subo nya. nakakatuwang pag masdan at mahahawa ka sa saya. kaya naman sa tuwing hihirit at maglalambing na magluto ng mga kakanin at mga minatamis ay hindi ko sya mapa-hindian. at ang polvoron ay isa sa mga inihirit nya sa akin.

binigyan natin ng kakaibang twist ang polvoron ngayon ganang, si mommy kat ay "fan" ng tsokolate. ito aming inihanda para sa kanyang baby shower bukas. ay ibabahagi ko sa mga susunod na araw ang ilan pang mga putahe na ihahanda namin sa nasabing kasiyahan.

CHOCO-POLVORON 

Choco Polvoron

sangkap:

4 cups Flour

2 cups Powdered Milk

2 cups Asukal

1 cup Milo / Ovaltine

1 1/2 cup Butter

Chocolate coating:

2 bars Milk / Dark Chocokate

Sprinkles

Balot:

Papel de Hapo

Cup cake paper

pamamaraan:

1. sa kawali ay isangag ang harina hanggang sa maluto ang mag-iba ang kulay. tiyaking tuluy-tuloy ang paghalo sa harina para maiwasang masunog ito. 

2. kapag naisangag na ang harina ay maaari na itong hanguin at palamigin.

3. sa sinangag na harina ay ihalo ang gatas.

4. ihalo ang Milo / Ovaltine.

5. ilagay ang asukal. tiyaking mahalong mabuti ang lahat ng sangkap.

6. kapag nahalo na ang lahat ng mga dry o powedered ingridients ay maaari nang ihalo ang butter. dapat ang butter ay napalambot na para madali itong maihalo sa mga sangkap.

Butter - ito ang magsisilbing binder ng polvoron.

7. maaari ng i-hulma ang mixture at ibalot. ngunit dahil espesyal ang polovoron na ito ang i-ko-coat natin ito sa tinunaw na tsokolate.

8. ilagay ang mga nahulmang polovoron sa loob ng ref para mag-set o patigasin sa loob ng 20-30 minuto.

nahulmang Polvoron

9. samantala, magpakulo ng tubig sa maliit na kaserola. ang hakbang na gagawin para dito ay tinatawag na double boiler technique (i-click ito)

10. sa tinunaw na tsokolate ay maaari nang isa-isang itubog ang mga nahulmang polvoron at ilatag sa wax paper para patigasin ito. maaaring budburan ng mga sprinkles ang ibabaw nito at palamigin.

Order na!

Plain Polvoron

bibingkang kanin ala 201a

ako ang isang taong hindi nahumaling sa mga pagkaing matatamis di katulad ng mas nakararami. hindi ako makikipag-awan sa mga tsokolate, kendi, ice cream at mga kakanin. bagkus ay may partikular na lasa akong magugustuhan kung ito ay mamait-mait tulad ng dark chocolate na puro at walang nuts o caramel. o dili kaya ay mocha flavor sa ice cream at mga kahalintulad na pagkaing malamig. sa kakanin naman, mas nais kong mangibabaw ang natural na lasa ng gata, o ube, o mantikilya o ng asukal na medyo sunog ---na may pait ika nga!

at pagdating sa kakanin, ang bibingkang kanin ang patok sa panlasa ko. hindi sa tamis nitong taglay kundi ang "toppings" nito na medyo sunog na may kakaibang linamnam at me pait! winner ika nga! 

hindi ako eksperto sa pagluluto lalu na ng mga kakanin, ngunit mayroon akong lakas ng loob na subukan, ganang ako ay nagnanais na makakain nito. matagal kong isinasalansan sa aking isipan ang mga pamamaraan ng pagluluto nito. maka-ilang daang beses kong paulit-ulit na binabasa ang mga nakalathang mga recipe nito. urong-sulong ako kung iluluto ko nga ba ito. sa aking buwanang pamimili ng aking suplay ay unti-unti kong binibili ang mga sangkap. una kong binili ay ang malagkit na bigas. mahigit isang buwang naghihintay ang malagkit na bigas na ito ay mailuto. hanggang isang huwebes ng gabi dito sa aming abang flat... nagkayayaang magluto nito. nasambit ko na wala akong gata, asukal at iba pang sangkap ngunit sa pagnanais din ng mga ka-flat ko na kumain nito ay namili sila ng mga dagdag na sangkap. kaya wala ng dahilan para hindi mailuto ang pinakaaasam na kakanin ng bayan!

so, wala na talagang atrasan ito. lulutuin ko na talaga ang kakanin! 

BIBINGKANG KANIN ng 201A

BIBINGKANG KANIN ala 201A

mga sangkap:

4 cups malagkit na bigas

2 cups asukal

3 cans gata

1 can condensed milk

1/2 cup butter

1 teaspoon luya na ginayat ng pino

gakurot na asin

pamamaraan:

1. hugasan ang bigas at ilagay ang luya, asin at 3 1/2 cups ng tubig.  at isalang sa rice cooker.

2. sa kawali, pagsama-samahin ang 2 cans ng gata, asukal at ang lutong malagkit. at isalang sa mahinang apoy. tuluy-tuloy na haluin para maiwasang masunog ito.

simula ng pagpapalaki ng braso sa kakahalo nito!

3. kapag halos matutuyo na ay ilagay ang 1/4 cup ng butter sa mixture at lutuin sa loob ng 1-2 minuto. at kapag ang mixture ay sumasama na sa sandok at bumibigat na ay maaari na itong hanguin. samantala, ihanda ang baking pan at lagyan ito ng natitirang 1/4 cup ng butter bago ilagay ang malagkit.

tiyaking "well distributed" 
ang malagkit sa baking pan

4. at ibuhos ang (pinaghalo na) natitirang gata at kondensada. at isalang naman ito sa oven sa mahinang apoy lamang. 

sabi ng mga ka-flat ko 
 ay pawang pigsa daw yan, he he he

5. matapos ang 15-20 minutes ay luto na. palamigin at pwede na itong kainin!

ayon sa mga kumain e, winner daw
at anila, lasang yema ang toppings nito!
kaya, sa uulitin daw :)