PAGLALAKBAY

Mahigit limang taon na ang lumipas ng aking tahakin ang buhay ng isang migranteng Pilipino o mas kilala sa bansag na "Bagong Bayani" daw. Sa limang taon, natutong mamuhay ng mag-isa at malayo sa mahal sa buhay. Na ang tanging gawi sa araw-araw ay Bahay-Trabaho-Bahay. Ngunit syempre sa kalagitnaan ng pag-angkop ay nagkaroon ng mga iba pang pinagka-aabalahan tulad ng pag-gym, takbo, swimming at sagwan. Nasanay na manirahan sa masisikip na tahanan na animo'y sardinas kayong nagsisikan sa bahay. Sa iyong mumunting espasyo ay naroon ang iyong kabuan - ihihiga ang pagal na katawan sa maliit na kama at mag-iipon ng panibagong lakas para sa kinabukasan. Liban sa istorya na yan mas nais kong bigyang diin ang mismong paglalakbay  sa iba't-ibang lugar. 

Ang mga larawan sa ibaba ay nagbabahagi ng aking mga di malilimutang karanasan sa bawat lugar na napuntahan. At sana sa hinaharap ay mas marami pa akong mapuntahan at magkaroon pa ng maraming alaala na huhubog sa aking katauhan.

DUBAI, UAE

Standard Chartered Bank: Dubai Marathon 2015 Finisher

On my way to the finish line... 42 kilometers.

KISH, IRAN

Exit sa Kish, Iran. January 2011

DOHA, QATAR

with Buboy at Corniche, Doha, Qatar 2013.

DIBBA, OMAN

Salomon Wadi Bih - Team Relay 72km 2015

Salomon Wadi Bih - Team Relay 72km 2016

TBILISI, GEORGIA

Unang biyahe naming magkakaibigan sa Georgia. October 2015

Georgia. October 2015

"Sa aking paglalakbay kay raming natutunan, pagpunta sa kabundukan ay katatagan ang kailangan. May layunin bawat paglalakbay..." -mula sa isang progresibong awitin na Paglalakbay.

DRAGONBOAT

sa aking pagbabalik-tanaw, malayung-malayo na ako sa dati.

mula sa dating lalampa-lampa at walang anumang tikas sa anumang laro o paligsahan.

ngayon ay nabago na.

nagsimula ng subukan kong tumakbo.

nagustuhan ko ang pakiramdam.

buong-giliw kong niyakap ang buhay ng isang mananakbo.

nagawa ko ng makatakbo ng apatnapu't dalawang kilometro.

Standard Chartered Dubai Marathon 2015. January 2015

ano na nga ba ang susunod?

sinubukang lumangoy.

ngunit magpahanggang ngayon ay di pa rin kami magkasundo.

takot pa rin ako sa malalim na bahagi ng katubigan.

kaagapay ng takot ay ang maling paghinga.

ngunit sa isang banda ay di ko pa rin naman ito sinusukuan.

unti-unti ko itong papangibabawan.

subalit sa kasalukuyan ay mayroong panibagong hamon ang katubigan.

ito ay ang pagsagwan.

o ito ay mas kilala sa katawagan na "DRAGONBOAT'.

Dubai Creek Dragon Boat Festival. February 2016

may kakaibang kabig ito sa akin.

panibagong hamon na ibinibigay sa bawat pagsagwan.

ngunit malaki ang kaibahan nito sa aking pagtakbo at paglangoy.

kasi dito ang bawat kilos at galaw mo ay nakaayon sa iisang kumpas.

RAK Dragon Boat Festival 2016. Mixed Category 2km. April 2016

hindi lamang ikaw ang gagalaw kundi kasabay mong kikilos ang bawat miyembro sa bangka.

para kayong isang pulutong na sabay-sabay at koordinado ang bawat galaw.

at tanging boses ng Timon ang siyang magigiya nito sa pagsulong.

RAK Dragon Boat Festival. Womens Category: 500m. April 2016

walang pwedeng mauna.

walang pwedeng mahuli.

walang pwedeng huminto.

RAK Dragon Boat Festival 2016. Womens Category 200m. April 2016

dapat ang lahat ay sabay-sabay.

sabay-sabay na sasagwan patungo sa tagumpay.

ULTIMATE JUNKIES Dragon Boat Team

Pabatid: Ang mga larawan ay kuha nila Mark at iba pang miyembro ng UJDBT.

Ultimate Junkies Dragon Boat Team

TAKBO

Noong 2011 ay napagpasyahan kong bumili ng "running shoes" ito ay para matupad ang matagal ko ng pinapangarap na maging physically active at healthy, kuno. Subalit inabot ng 2012 bago ko ito akwal na magamit sa pagtakbo. Syempre sa maraming kadahilanan ay hirap na maituloy ang hangarin. Kesyo pagod sa trabaho, iisa lang ang day-off, maglalaba pa ko, tutulog muna ko at mahabang listahan pa ng mga dahilan para hindi matuloy ang pagtakbo. Ang daming justification ika nga.

Bagamat nakaka-takbo na kahit paano noong 2012 ay di ganun ang kasigasigan kong tumakbo. Kapos sa buong-giliw na pagyakap sa benepisyo ng takbo. Walang puso ika nga. Nakakatamad din naman kaya (excuse na naman, di ba?). Sa kadalasan ay hanggang SANA, sana, SANA, sana at marami pang SANA ang sinasambit ko.

Bakit ba napakahirap gawin ang bagay na ito? Mahirap nga ba? O sadyang ayaw lamang? Laging nauuna ang mga pangamba at pag-estima sa sariling kakayanan. Laging takot. Laging nauuna ang mga konklusyon. Pero puno naman lagi ng panghihinayang kapag hindi maisakatuparan.

Yalla!!! Gawin na!

At noong Oktubre 15, 2013 ay matagumpay ko ng naisakatuparan ang "tunay na pagtakbo"! Sa kabila ng mga pag-aalinlangan ay sumige akong sumama sa isang grupo ng mga mananakbo dito sa Dubai. Ito ay ang Filipino Runners UAE o FRU. At hindi ako nagkamali sa aking naging desisyon na kung saan unang-una kong nagapi ang sarili mula sa aking mga mahabang listahan ng mga dahilan.

Isang malaking tagumpay at nakatakbo, tumatakbo at tatakbo pa rin ako!

Kita-kits sa mga lansangan!

Let's go, SAGOW!


Pabatid: Ang mga larawan ay kuha ni BuongBilog.

Papa B's Pork, Mushroom & Asparagus in Oyster Sauce

nakakatuwang malaman na marami sa ating mga OFW's ay nagkaroon ng pagkakataong matutunan at kagiliwan ang pagluluto. mantakin mo ba namang mag-isa ka. magugutom ka kapag naghintay ka ng himala na may maghahain ng pagkain sa harapan mo. ang karaniwang OFW ay maghapong kumakayod mula umaga hanggang gabi. tulad na lamang ng ating panauhin ngayon, isang magiting na migranteng manggawa na tubong Bulacan... pasalubungan po natin ng masigabong palakpakan at di magkamayaw na hiyawan - walang iba kundi si PAPA B!!!

"Ako po si Bernabe Pascual Jr. 
may asawa at tatlong mga anak, 
ako po ngayon ay nagtatrabaho sa Dubai, 
limang taon na po akong ofw. 
Noong ako po ay nasa pilipinas hindi naman po ako mahilig magluto, 
pinanood ko lang pong magluto ang aking Tatay, Nanay, Kuya at Ate, 
pero mahilig po akong kumain, ha ha ha..
 dito lang po akong nag-umpisang magluto 
simula nung malayo ako sa aking mga mahal sa buhay."

Papa B's Pork, Mushroom & Asparagus in Oyster Sauce

Mga sangkap:

¼ na baboy – liempo
1 latang kabute – hiwa-hiwa
1 balot na asparagus
3 pirasong bawang
1 pirasong sibuyas
2 kutsarang mantika
1 lutsatirang chilli powder (kung gusto lang maanghang)
½ tasang oyster sauce

Paraan ng pagluluto:

1. Ilagay ang mantika sa mainit na kawali, igisa ang bawang at sibuyas.

2. Ilagay ang baboy hanggang magkulay brown.

3. Ilagay ang kabute haluin at hayaan muna hanggang 3 minuto.

4. Ilagay ang oyster sauce haluin at pakuluin hanggang mga 5 minuto.

5. Habang niluluto ang baboy magpakulo ng tubig, hugasan ang asparagus ilagay sa isang malukong na mangkok at lagyan ng kumukulong tubig hayaan hanggang 2-3 minuto, alisin ang tubig para malutong pa din ang asparagus.

6. Pagkaluto ng mga pinag-halo halong sangkap hanguin sa malukong na mangkok at ilagay sa ibabaw ang asparagus.

Pahahain: 4-5 na platito